मोठ्या लोकांबरोबर फोटो काढून घेण्याची हौस?
केवळ कर्तुत्ववान आईवडिलांच्या पोटी जन्म घेतला म्हणून त्यांच्या मुलांना कर्तुत्ववान होता येत नाही. थोडेफार पाठबळ मिळत असले तरी शेवटी स्वतःचे कर्तुत्व स्वतःलाच सिद्ध करावे लागते. समाजातील मोठ्या लोकांच्या मुलांची ही स्थिती तर मग अशा मोठ्या लोकांशी काडीचाही संबंध नसताना त्यांच्या मागे लागून त्यांच्या बरोबर स्वतःचा फोटो काढून घेऊन तो जगभर मिरविण्याची हौस चुकीची नव्हे काय? स्वकष्टाने मिळविलेले आपले स्वतःचे कर्तुत्व छोटेसे का असेना पण त्याचा स्वाभिमान (सेल्फ रिस्पेक्ट) हवा. त्या स्वाभिमानाला त्या मोठ्या लोकांच्या शेजारी नेऊन छोटे करू नका. मी भूतकाळात असा वेडपटपणा काही प्रसंगी केला व स्वकष्टाने प्राप्त केलेल्या माझ्या उच्च शिक्षणाला व वकील पदाला अप्रत्यक्षपणे कमी लेखले. आता हा मूर्खपणा करणार नाही. या मोठ्या लोकांनी स्वतःहून तुमच्या कर्तुत्वाचा मान ठेवून तुमच्या बरोबर त्यांचा फोटो काढला तर तो फोटो स्वतःच्या कर्तुत्वाचा मान म्हणून जगाला दाखविण्यात काहीतरी अर्थ आहे नाहीतर नाही. तुम्ही एखाद्या प्रसिद्ध खेळाडूचे, कलाकाराचे, नेत्याचे चाहते (फॕन) असणे यात काही गैर नाही पण फॕनला (पंख्याला) लटकल्यासारखे त्या खेळाडू, कलाकार किंवा नेत्याच्या मागे मागे करून त्याच्या सोबत स्वतःचा फोटो काढून घेऊन तो जगभर मिरविणे यात स्वतःचे कर्तुत्व (असेल तर) झाकोळण्यासारखे आहे असे मला वाटते.
-©ॲड.बी.एस.मोरे, १०.६.२०२४
कोणत्याही टिप्पण्‍या नाहीत:
टिप्पणी पोस्ट करा