सृष्टी परिवर्तन चक्र!
अंतराळ विश्वात निसर्ग किती फुगे फुगवतो, फुगवून ठेवतो व फोडतो या खेळाचा नीट अंदाज पृथ्वीवरून बांधता येत नसला तरी त्याचा पृथ्वीवरील हा खेळ मात्र पृथ्वीवर जगणाऱ्या व मरणाऱ्या सर्व जिवांना प्रत्यक्षात बघायला, अनुभवायला मिळतो.
निसर्गाने पृथ्वीवर उत्क्रांत केलेली सजीव व निर्जीव पदार्थांची सृष्टी परिवर्तन चक्रात सृष्टीतून पुनर्निर्मित होते, सृष्टीतच काही काळ टिकून राहते व शेवटी सृष्टीतच विसर्जित होते. सृष्टी पुनर्निर्मितीचे, टिकण्याचे व विसर्जनाचे एक परिवर्तन चक्र निसर्गाने पृथ्वीवर निर्माण केले आहे. सृष्टीच्या परिवर्तन चक्रातील पुनर्निर्मितीला, काही काळ अस्तित्व टिकवून धरण्याला व शेवटी सृष्टीतच विसर्जित होण्याला सृष्टीचे चक्राकार परिवर्तन असे म्हणता येईल.
जसा पृथ्वीवरील पाऊस पृथ्वीवरील सागरातूनच निर्माण होतो, काही काळ पृथ्वीवर पिण्याच्या पाण्याचा वर्षाव करीत राहतो व शेवटी त्या सागरातच चक्राकार विसर्जित होतो तसेच सृष्टीचे परिवर्तन चक्र पृथ्वीवर अनंत काळापासून चालू आहे. पृथ्वी व तिच्या सृष्टीसाठी सूर्य हाच ईश्वर आहे ज्याला सूर्यनारायण म्हणतात. हा सूर्यनारायण पृथ्वीचा ईश्वर आहे, परमेश्वर नव्हे. अंतराळ विश्वातील प्रचंड मोठ्या उर्जा स्त्रोताला संपूर्ण अंतराळ विश्वाचा परमेश्वर असे म्हणता येईल.
सूर्यनारायण त्याच्या प्रकाशमय व उर्जायुक्त किरणांनी पृथ्वीला व तिच्यावरील सृष्टीला दररोज स्पर्श तर करतोच पण पृथ्वीला तिच्या सृष्टीसह नियंत्रितही करतो. अगदी तसाच अंतराळ विश्वाचा परमेश्वर (विश्व चैतन्य किंवा विश्व उर्जा स्त्रोत) पृथ्वी व तिच्या सूर्यासह सूर्यमालेला व अंतराळ विश्वातील असंख्य ग्रह, ताऱ्यांना स्पर्श करतो व त्यांना नियंत्रित करतो. पण तो परमेश्वर पृथ्वीवरील माणसांच्या दृष्टीस पडत नाही. सूर्यनारायण मात्र लांबून दृष्टीस पडतो. पण तरीही पृथ्वीवरून दृष्टीस पडणाऱ्या सूर्यनारायणाला पृथ्वीवरील कोणाला तरी प्रत्यक्षात भेटता येते का? सूर्यनारायणाला भेटण्याची इच्छा म्हणजे जळून खाक होण्याची इच्छा. सूर्यनारायण त्याच्या उर्जा किरणांच्या माध्यमातून आपल्याला येऊन भेटतोय तेवढेच पुरेसे आहे. आपण त्याला जाऊन भेटण्याची इच्छा बिलकुल नको मग अशा इच्छेला वैज्ञानिक इच्छा म्हणा नाहीतर आध्यात्मिक इच्छा! आपण जर सूर्याला भेटू शकत नाही तर मग अंतराळ विश्वाच्या परमेश्वराला (विश्व उर्जा स्त्रोताला) काय भेटणार?
पृथ्वीवर सतत चालू असलेली सृष्टी चक्रातील परिवर्तन क्रिया ही निसर्गशक्तीची (विश्व चैतन्याची/परमेश्वराची) पृथ्वीवरील वातावरणात सृष्टीचे फुगे फुगवण्याची, त्या फुग्यांचे ते फुगीर अस्तित्व काही काळ टिकविण्याची व शेवटी ते फुगलेले फुगे फोडण्याची चक्राकार परिवर्तन क्रिया होय. पृथ्वीवरील सृष्टीचा फुगा तिच्या परिवर्तन चक्रात पृथ्वीवर फुगतो, पृथ्वीवर त्या फुगीर अवस्थेत काही काळ टिकतो व पृथ्वीवरच फुटतो. सृष्टीचे हे फुगणे, फुगीर अवस्थेत काही काळ टिकून राहणे व शेवटी फुटणे या पृथ्वीवर अनंत काळापासून चालू आहे.
-©ॲड.बी.एस.मोरे, २५.६.२०२४
